Hierdie artikel is deur Susan Goosen geskryf wat saam met ons getoer het en is geplaas in Die Burger 26 Julie 2008.

Die rolprent Out of Africa wat dieverhaalvanKarenBlixen uitbeeld – dit was die oorsprong van my begeerte om ook eendag die wye ruimtes en ryk diereskat van Afrika te kon ervaar. Sommiges pak die sowat 5 000 km padlangs aan, maar ander, soos ons, doen dit op die gemaklike manier. Die reëlings worduit jouhande geneemdeur ’n toermaatskappy. Al wat jy hoef te doen, is terugsit en ontspan.

Dag 1
Ons vlieg vanaf die O.R.Tambolughawe via Dares Salaam en Zanzibar na Kilimandjaro. Ons oornag in Arusha,Tanzanië se oerismehoofstad. Byna al die toerismeplekke van dié land lê in ’n radius van 300 km hiervandaan. Tanzaniëmoes vir lank die knie buig voor Kenia as toerisme bestemming, maar nie meer nie. Vir die toeris is hie rveel meer te sien en te ervaar as net die migrasie van die diere. Om die kruin van Kilimandjaro te bereik, is vir baie nog ’n droom.

Dag 2
Ons gids groet met ’n vriendelike “Jambo, jambo” wat hallo in Swahili beteken. Later sou ons baie respek kry vir sy kennis oor bykans enige onderwerp, hetsy dit die plant-of diereryk, politiek of sy land se geskiedenis is. ’n Wandelende ensiklopedie, voorwaar. Arusha is ’n besige, kleurryke stad. Fietsryers en taxi’s is volop en vleg tussen talle voetgangers deur. Handgeverfde advertensieborde adverteer fietsparte, haarsalonne, eetplekke, selfone en nog wat. Die meeste geboue skree vir ’n lagie verf en bietjie aandag. Instandhouding is duidelik nie ’n prioriteit nie. Ons volg die M203 uit die stad – die enigste roete na die Manyarameer, Ngorongoro-krater en die Serengeti Nasionale Park. DieManyara- meer is sowat 60 km van Arusha in die Manyara-meer Nasionale Park. Die Manyara-meer is naas die Victoria-en Eyasi meer, Tanzanië se grootste meer en beslaan sowat 350 km². Vanaf die rand van die Skeurvallei is dit ’n ongelooflike prentjie wat voor ons oë oopvou. Die reënwoude van Manyara word bewoon deur verskeie primate. Manyara is ook bekend vir sy boomklimmende leeus. Ja, regtig. Ons sien dan ook’n lui leeumannetjie wat uitgestrek lê op ’n boom tak wat oor die pad hang. Dan vervies die koning van die bos hom vir al die nuuskieriges, maak sy misnoeë grommend bekend en verdwyn stil in die bos. Selfs ons gids het nog nooit voorheen die boomklimmende leeus gesien nie. Die olifant populasie was erg uitgedun deur wildstropers, maar word nou beskerm. Hulle is verbasend rustig en stap slegs ’n paar meter van ons voertuig verby. Vir die voëlliefhebber is dit ’n paradys met 300 voëlspesies. Die meer voorsien duisende pelikane en flaminke van kos. Wildebeeste vergader naby ’n watergat tydens migrasie in die Serengeti. Ons oornag op die rand van die Skeurvallei in die lieflike Lake Manyara Serena Lodge.

Dag 3
Ons is op pad na Tanzanië se oudste en mees gewilde nasionale park, die Serengeti. Maar eers stop ons by ’n Masai-kraal. Lang, skraal mans met spiese in die hand begroet ons met ’n verwelkomings dans en lied. Elke lied vertel ’n storie waarvan ons Westerlinge nie veel verstaan nie. Mans en vrouens is ryklik versier met kralewerk en helder doeke wat om hulle gedrapeer is. Die mans gebruik die spiese om hulle vee teen roofdiere te beskerm.’n Gewilde drankie is ’n mengsel van melk en bloed. Die naam Serengeti kom van die Masai-woord wat “oop vlaktes” beteken. ’n Bord, iewers tussen niks en nêrens, dui aan dat ons nou die wêreld beroemde park gaan betree.’n Hele 14 700 km² van ongerepte Afrika strek voor ons uit. Die Serengeti is veral bekend vir sy jaarlikse migrasie van ongeveer 2 miljoen wildebeeste, ’n kwartmiljoen sebras en etlike duisende Thomson-gaselle tussen Tanzanië en Kenia. Die diere beweeg van suid na noord opsoek na kos. Die vloei van diere is afhanklik van die weerpatrone en daarom wissel dit van jaar tot jaar. Selfs al is die migrasie verby, verskaf die Serengeti die beste wildbesigtiging in Afrika. Groot troppe buffels, olifante en kameelperde is volop asook sowat 3 000 leeus. Die oop grasvlaktes maak dit ook maklik om wild raak te sien. En daar is baie. Amper om elke hoek en draai. Soms is die paadjie maar erg stamperig, maar die kwinkslae van ons gids en ander toerlede maak dit draagliker. Vir die volgende 2 aande oornag ons indie Serena Serengeti Lodge.

Dag 4
Die hoogtepunt van ons toer breek aan.Ons ry vroeg om na die migrasie te gaan kyk. In ons viertrekvoertuig is daar ’n merkbare opgewondenheid onder almal. Die diere is vanaf November tot Mei in die Serengeti waar hulle ook kalf. Dis dan ook die nat seisoen. Maar sodra dit droër word, trek hulle noordwaarts na die Masai Mara in Kenia. ’n Sirkelroete van 1 000 km word afgelê om dan’n Masaigesin voor hul hut gemaak van latte en beesmis. Naby die Retima Hippo-poele vou ’n see van wildebeeste voor ons oop. Dis soos vlooie op ’n hond se rug. Van horison tot horison kom hulle aan.Party hardloop, ander loop, ander maal rond, maar almal is op pad noord waarts – aangedryf deur ’n eeue oue instink. Ons ry vir kilometers tussen bulkende, malende wildebeeste en sebras. Vanuit alle oorde kom hulle aangestroom. Die geklap van pote, die stof, die gemaal en gebulk – jy voel deel van hierdie uittog na nuwe weivelde. Almal in die voertuig is aangegryp.

Dag 5
Ons vertrek op dieselfde roete terug na die Ngorongoro-krater. Dis ’n goeie 7 uur se ry en daarom ry ons vroeg. ’n Eensame wildebeeskalfie wat sy ma verloor het, bulk hartseer. Ek voel jammer vir hom, want voor die aand aanbreek, gaan hy beslis leeukos wees. Ons sien dan ook talle leeus. Die gelyk grasvlaktes maak dit baie maklik. Ons besoek ook die Olduvai-ravyn wat as die wieg van die mensdom bekend staan. Vir die argeoloog is dit een van die bekendste terreineterwêreld. Louis en Mary Leaky, ’n skotse egpaar, het jare in die sandsteenagtige koppies gesoek na die vroegste argeologiese bewyse vir die ontstaan van die mensdom. Hulle ontdekkings het die teorie gestaaf dat die mensdom in Afrika ontstaan het. Na ure se geskommel in ons voertuig, word ons beloon met die allermooiste uitsig oor die Ngorongoro- krater. Ons oornag in die pragtige Ngorongoro Serena Lodge wat met vulkaniese rots gebou is. Voorwaar vyfster-verblyf.

Dag 6
Vroeg-vroeg word ons uit die vere gejaag om die 600 m- stamperige tog na die vloer van die krater aan te pak. Die krater se ekosisteem is uniek. Die hoë reënval sorg vir ’n permanente watervloei dwarsdeur die jaar. Die klam klimaat hou die reënwoude op die steil oostelike en suidelike kraterwande in stand wat water absorbeer om dit weer in die droë seisoen in die vorm van mis vry te laat. Hierdie park is ’n paradys vir duisende wildebeeste, sebras, gaselle, honderde buffels, olifante, roofdiere en 250 voëlspesies. By die watergat staan duisende pienkflaminke – die voëlentoesias se droom. Leeus is volop en ons gids weet net waar om hulle tekry.

Dag 7
Ons vertrek op die laaste been van ons sirkelroete terug na Arusha. Ons stop vir oulaas by ’n groterige stalletjie langs die pad.
Almal probeer iets aan jou verkwansel.

Dag 8
Ons vertrek terug na Johannesburg. Dit was ’n wonderlike ervaring, nog beter as wat ek my dit voorgestel het. Ek groet jou, Afrika.’

Dit en dat

• ’n Gids maak dinge baie makliker. Hy verstaan die taal en kultuur en kan ’n mens oneindig baie moeite spaar. Hulle weet ook
gewoonlik waar die wild is en kommunikeer met ander gidse.

• Klimaat is oorwegend tropies. Daar is ’n klein verskil tussen seisoene. Hou ’n warm baadjie byderhand vir hoërliggende gebiede.

• Ligte klere, byvoorbeeld Themde, kortbroeke, liggewigbaadjie, gemaklike stapskoene en hoed. Pak ook ’n flits, sonbrandmiddel, sonbril en insekweerder in. Steekvlieë kan lastig raak.

• Onthou: selfoon, visum, geelkoorsinspuiting (R400) en malariapille

• Geldeenheid: Tanzaniese sjieling, maar dollars is altyd welkom. Kredietkaarte by groot hotelle en reisagente word aanvaar.

• Tanzanië het onafhanklikheid in 1961 verkry. Daar is 126 etniese groeperinge, elk met sy eie taal. Swahili is die amptelike taal
wat deur almal gepraat word.

• Die kos in al die lodges was van die boonste rak. Gebottelde water word verskaf. Vermy die drink van kraanwater. Bier en
koeldrank is goedkoop, spiritualieë is duur. Neem jou eie saam.

• Ons het gebruik gemaak van Seagulltoere
(0042 293 2753/2339 of epos: tanya.venter@harveyworld.co.za)